لاہور:وزیراعلیٰ پنجاب عثمان بزدار نے جنوبی پنجاب سیکرٹریٹ کیلئے الگ ایڈیشنل چیف سیکرٹری اور ایڈیشنل آئی جی کے تقرر کی منظوری دیتے ہوئے کہا ہے کہ اب محرومیوں کے شکار عوام کو اپنے کام کے سلسلے میں لاہور کے چکر نہیں لگانا پڑیں گے۔

وزیراعلیٰ پنجاب عثمان بزدار سے سرکٹ ہاؤس بہاولپور میں اراکین پنجاب اسمبلی اورتحریک انصاف کے عہدیداروں نے ملاقات کی۔

اس موقع پر گفتگو کرتے ہوئے وزیراعلیٰ پنجاب نے کہا کہ جنوبی پنجاب کی محرومیاں دور کرنے کیلئے ان کی حکومت نے مثالی اقدام کئے ہیں،علیحدہ سیکرٹریٹ کا قیام جنوبی پنجاب کے عوام کا حق ہے جو تحریک انصاف کی حکومت نے انہیں دیا ہے اور جنوبی پنجاب کے عوام کا احساس محرومی ختم ہورہا ہے۔

عثمان بزدار نےمزید  کہا کہ جنوبی پنجاب کے عوام کو ماضی میں دلفریب نعروں سے بہلایا گیا،سابق حکمرانوں نے جنوبی پنجاب کیلئے صرف زبانی جمع خرچ سے کام چلایا،سابق ادوارمیں پسماندہ علاقوں کے عوام کو نظر انداز کیا گیا۔

وزیراعلیٰ پنجاب کا کہنا تھا کہ  جنوبی پنجاب کے عوام نے سابق حکمرانوں کی زیادتیوں کا بدلہ عام انتخابات میں انہیں شکست دے کرلیا، جنوبی پنجاب کے پسماندہ علاقوں کے عوام کی محرومیوں کوخوشحالی میں بدلیں گے۔