ایک جانب کورونا وائرس کی وجہ سے دنیا بھر کی صورتحال بگڑتی جارہی ہے وہیں دوسری جانب امریکی صدر ڈونلڈ ٹرمپ نے دعویٰ کیا ہے کہ انہوں نے کورونا وائرس کی ویکسین تیار کرلی ہے۔

ڈونلڈ ٹرمپ کا دعویٰ ہے کہ امریکا نے کورونا کی ویکسین دریافت کرلی ہے اور اس کے 20 لاکھ ڈوز تیار ہیں تاہم اس کے محفوظ ہونے کی تصدیق ہوتے ہی اس کا استعمال شروع کردیا جائے گا۔

صدر ٹرمپ نے مزید کہا ہے کہ ویکسین کو لے کر ہوئی میٹنگ میں پتہ چلا ہے کہ ہم حیرت انگیز طور پر بہتری کی جانب جارہے ہیں، ٹیم لگاتار اچھا اور تیزی سے کام کر رہی ہے۔

اتنا ہی نہیں ٹرمپ نے اعتراف کیا کہ کورونا وبا سے ان کے ملک کی حالت کافی خراب ہوئی ہے، امریکی معیشت دنیا میں سب سے بہتر تھی لیکن اب ہم خراب حالات سے گزر رہے ہیں۔

واضح رہے کہ کورونا وائرس کی وجہ سے امریکا دنیا میں سب سے زیادہ متاثر ہوا ہے۔ اب تک امریکا میں 19 لاکھ 76 ہزار سے زائد افراد اس وباء کا شکار جبکہ 1 لاکھ 11 ہزار سے زائد افراد انتقال کرگئے ہیں۔ اس کے علاوہ 7 لاکھ 39 ہزار سے زائد افراد صحتیاب بھی ہوچکے ہیں۔