کراچی:گورنر اسٹیٹ بینک کہتے ہیں کہ بینک ٹرانزیکشن پر عائد ود ہولڈنگ ٹیکس کے باعث بینک ڈپازٹ میں کمی آئی، معاشی ترقی بڑھانے کے لیے برآمدات اور براہ راست غیرملکی سرمایہ کاری میں اضافہ ضروری ہے۔

گورنر اسٹیٹ بینک اشرف محمود وتھرا نے پاکستان اسٹاک ایکسچینج کا دورہ کیا اور روایتی گھنٹہ بجاکر کاروبار کا آغاز کیا۔پاکستان اسٹاک ایکس چینج میں تقریب سے خطاب میں انھوں نے کہا کہ پاکستان اسٹاک ایکسچینج بہترکام کر رہا ہے اور ایم ایس سی آئی میں پاکستان کا دوبارہ داخل ہونا خوش آئند ہے، تقریب کے بعد میڈیا سے بات کرتے ہوئے انھوں نے کہا کہ بینک ٹرانزکشن پر عائد ود ہولڈنگ ٹیکس کے باعث بینکوں سے کافی پیسہ نکالا گیا۔

گورنراسٹیٹ بینک نے کہا کہ ملک نے دو سال میں نمایاں معاشی ترقی کی، اس میں مزید بہتری کے لیے طویل المدتی بنیاد پر برآمدات اور براہ راست سرمایہ کاری بڑھانے کی ضرورت ہے۔انھوں نے کہا کہ بجٹ خسارہ قابو میں ہے، ملکی تاریخ میں پہلی بار زرمبادلہ کے ذخائر بیس ارب ڈالرسے تجاوز کر گئے۔