اسلام آباد:قومی اسمبلی میں ملک میں جلد مردم شماری کرانے سے متعلق قرارداد متفقہ طور پر منظور کر لی گئی،احتساب بیورو کے اختیارات پر بھی گرما گرم بحث کی گئی۔

اسپیکر سردار ایاز صادق کی زیر صدارت قومی اسمبلی کے اجلاس میں ملک میں جلد مردم شماری کرانے سے متعلق قرارداد متفقہ طور پر منظور کر لی گئی۔نفیسہ شاہ نے کہا کہ بلا تاخیر مردم شماری کرائی جائے، اس حوالے سے خوف نہیں ہونا چاہئے۔وزیر مملکت برائے پارلیمانی امور شیخ آفتاب نے کہا کہ دو ہزار اٹھارہ کے انتخابات نئی مردم شماری کے تحت ہوں گے،مردم شماری دو ہزار آٹھ میں ہو جانی چاہیے تھی لیکن پیپلزپارٹی نے نہیں کرائی، دیگر اراکین نے بھی بحث میں حصہ لیا۔

قومی اسمبلی میں نیب کے اختیارات پر بھی بحث کے دوران عمران ظفر لغاری کا کہنا تھا کہ کے پی کے حکومت کو خراج تحسین پیش کرتا ہوں کہ اس نے احتساب قوانین اور آئین کی تشریح کی،چیئرمین نیب کے اختیارات عدلیہ سے بھی زیادہ ہیں،اٹھارویں ترمیم کے بعد نیب کی صوبوں میں کارروائیاں غیر قانونی ہیں۔

قومی اسمبلی میں عمررسیدہ افراد کی کم عمربچیوں سے شادی پر سزا بڑھانے،سپریم کورٹ کے ججز کی تعداد سے متعلق بل متعلقہ کمیٹیوں کے حوالے کر دیئے گئے۔