اسلام آباد:وزیراعظم نوازشریف نے قوم سے خطاب کرتے ہوئے کہا کہ لاہور سانحے کے باعث ہر پاکستانی کا دل زخمی ہے۔شہیدوں کے خون کے ایک ایک قطرے کا حساب چکایا جارہا ہے،اس کی آخری قسط ادا ہونے تک چین سے نہیں بیٹھیں گے۔مسلح افواج، پولیس نے اپنے لہو سے آپریشن ضرب عضب کو پروان چڑھایا۔

وزیر اعظم کا اپنے خطاب میں کہنا تھا کہ دہشتگردوں کو اب دوبارہ سر نہیں اٹھانے دیں گے،ہم دہشتگردوں کو اب عوام کی جانوں سے نہیں کھیلنے دیں گے۔کوئی دہشتگرد ہمارے عزم میں شگاف نہیں ڈال سکتا، کوئی سازش ہمیں ہمارے عزم سے نہیں ہٹا سکتی۔انہوں نے مزیدکہا کہ ہم سنجیدگی کے ساتھ ہر چیز پر نظر رکھے ہوئے ہیں۔اس سلسلے میں روا رکھی نرمی کو ریاست کی بے بسی نہ سمجھا جائے۔

خطاب میں وزیر اعظم نے واضح کیا کہ فرقہ واریت کو ہوا دینے والوں کو قانون کے کٹہرے میں لایا جائے گا،الله اور رسول کے نام پر لا قانونیت اور بد امنی پھیلانا کسی طور قابل قبول نہیں۔انکا کہنا تھا کہ تمام اداروں کو کہہ دیا دہشتگردوں کے سرپرستوں کو پکڑا جائے۔میڈیا بھی دہشتگردی کے خلاف قوم کی آواز سے ہم آہنگ رہے۔