انہوں نے اپنی ٹویٹ میں مزید کہا کہ ہمیں اپنے خوبصورت شہر کو ٹھیک کرنے کی ضرورت ہے۔

سابق کپتان کی اس ٹوئٹ پر صوبائی وزیر ناصر حسین شاہ نے ردعمل دیتے ہوئے لکھا کہ میں اپنے پڑوسی وسیم اکرم کو دعوت دیتا ہوں کہ وہ آئیں اور میرے ساتھ کراچی کی سڑکوں کا دورہ کریں اور دیکھیں کہ کس طرح پانی کی نکاسی کی گئی ہے۔

ناصر حسین شاہ نے مزید کہا تھا کہ اگر آپ مخلص ہیں تو شہر کا دورہ ضرور کریں گے، اگر آپ نے سنی سنائی باتوں پر بیان دیا ہے تو آپ سے زیادہ غیر ذمہ دار کوئی نہیں ہے۔

ناصر حسین شاہ کے اس ردعمل پر وسیم اکرم نے ایک اور ٹوئٹ کیا جس میں اُن کا کہنا ہے کہ میں نے ٹوئٹ اسلئے کیا کیونکہ میں ڈیفنس کے بھرے ہوئے گٹروں کی ویڈیوز دیکھ رہا ہوں۔ اس کے علاوہ گلستان جوہر، پی ای سی ایچ ایس اور بلدیہ کی سڑکیں سیلاب زدہ ہیں، بارش سے ایک بار پھر شہر تباہ ہوا ہے۔

سابق کپتان نے اپنی ٹویٹ میں اس بات کی بھی وضاحت کی کہ میرا کوئی سیاسی ایجنڈا نہیں ہے، میں صرف پاکستان کا شہری ہوں، مجھے اپنے آبائی شہر میں لوگوں کی فلاح و بہبود کا خیال ہے۔

واضح رہے کہ ناصر شاہ نے اپنی ایک ٹویٹ میں نجی ٹی وی کی ویڈیو شیئر کرتے ہوئے یہ بھی لکھا کہ 'تبدیلی کا سفر وسیم اکرم پلس سے وسیم اکرم تک۔۔۔' انہوں نے یہ بھی لکھا کہ علی زیدی، عمران اسمعیل اور وسیم اکرم کے ٹوئٹس بلکل ایک جیسے ہیں۔

صوبائی وزیر نے سابق کپتان کو طنزیہ طور پر سیاست میں آمد کی مبارکباد بھی پیش کی۔