وزیر اطلاعات پنجاب فیاض الحسن چوہان نے شہباز شریف کی پریس کانفرنس پر ردِعمل میں کہا ہے کہ قائدِ حزبِ اختلاف اپنی ممکنہ گرفتاری کو سیاسی رنگ دینے کی ناکام کوشش کر رہے ہیں۔

انہوں نے کہا کہ شہباز شریف صاحب! آپ کی گرفتاری وزیرِ اعظم عمران خان کی ذاتی خواہش یا سیاسی انتقام نہیں۔ آپ کی گرفتاری آپکی لازوال، تابناک اور بے مثال کرپشن کے باعث عدالتوں اور احتسابی اداروں کی ضرورت ہے۔

ان کا کہنا تھا کہ شہباز شریف کا ایک دھیلے کی کرپشن نہ کرنے کا دعویٰ عوام کی آنکھوں میں مرچیں جھونکنے کے مترادف ہے۔ اے پی سی میں نواز شریف کی ایک گھنٹے کی تقریر نے شہباز شریف کی دو سالہ محنت زائل کر دی۔

انہوں نے مزید کہا کہ لیگی رہنما رات کے اندھیرے میں آرمی چیف اور خفیہ ایجنسی کے سربراہان سے ملاقاتیں کرتے ہیں اور دن کی روشنی میں یہی منافق رہنما قومی سلامتی کی اداروں کو ہدف تنقید بناتے ہیں۔