اسلام آباد ہائیکورٹ نے العزیزیہ اور ایون فیلڈ ریفرنس میں سابق وزیراعظم کی بذریعہ اشتہار طلبی کا حکم دیا تھا۔

عدالتی حکم پر عمل کرتے ہوئے وفاقی حکومت نے نوازشریف کی طلبی کیلئے اخبار میں اشتہار کے اخراجات اسلام آباد ہائیکورٹ میں جمع کرادیئے۔

ایڈیشنل اٹارنی جنرل طارق کھوکھر نے عدالت کے حکم پر رجسٹرار آفس میں 60 ہزار روپے جمع کرائے۔

ایڈیشنل اٹارنی جنرل نے رقوم کی وصولی سے متعلق رجسٹرار آفس کو خط لکھا،رجسٹرار آفس کو عدالت کے7 اکتوبر کے حکم نامے کا حوالہ دیا گیا ہے۔

ایڈیشنل اٹارنی جنرل کا کہنا تھا کہ عدالت نے 7 اکتوبر کے حکم نامے میں 2 اخبارات میں اشتہار جاری کرنے کی ہدایت کی تھی۔

طارق کھوکھر کا کہنا تھا کہ عدالت نے وفاق کو اخباری اشتہار کیلئےفیس جمع کرانے کی ہدایت بھی کی تھی۔

وفاقی حکومت کی جانب سے عدالت میں جمع کرائے گئے خط میں استدعا کی گئی ہے کہ انصاف کے تقاضوں کو مدنظر رکھتے ہوئے اشتہار جاری کرنے کا عمل جلد مکمل کیا جائے۔