ملتان میں پریس کانفرنس کرتے ہوئے انہوں نے مزید کہا کہ ملتان میں پی ڈی ایم کا جلسہ سلیکٹرز کیلئے پیغام ہوگا۔ پی ڈی ایم کے پلیٹ فارم پر اسٹیبلشمنٹ سے مذاکرات صرف یہی ہوں گے کہ سیاست میں مداخلت نہ کی جائے۔

رانا ثناء اللہ نے کہا کہ یہ ملک ووٹ کی طاقت سے بنا اور ووٹ کی طاقت سے ہی چلایا جانا چاہیئے۔ ہماری جدوجہد ملک میں شفاف انتخابات کی ہے۔ اب ہر شہری کا فرض ہے کہ پی ڈی ایم کی تحریک میں حصہ ڈالیں۔

انہوں نے مزید کہا کہ حکومت کی نااہلی کی وجہ اور غلط فیصلوں کی وجہ سے آٹا اور چینی بحران ہوا۔ آٹا چینی اور بجلی کی مد میں عوام سے 2375 ارب روپے زائد وصول کئے گئے۔ حکومت کی ناقص پالیسیوں کی وجہ سے ملک ری سیشن میں چلا گیا ہے۔

رانا ثناء اللہ نے مزید کہا کہ چینی مافیا کو عوام کی جیب پر تین سو ارب روپے کا ڈاکا ڈالنے کی اجازت دی گئی۔ جہانگیر ترین باقاعدہ ڈیل کے تحت اور جوڑ توڑ کے لئے ملک واپس آئے ہیں۔ اب ان کے خلاف سب انکوائریاں بند ہو جائیں گی۔

گلگت بلتستان کے لیکشن کے حوالے سے انہوں نے کہا کہ ہم دھاندلی کے حربوں سے آگاہ ہیں، گلگت میں پری پول دھاندلی کی جارہی ہے۔ موجودہ تناظر میں گلگت کے الیکشن کو شفاف نہیں کہہ سکتا۔

ان کا مزید کہنا تھا کہ عمران خان 36 گھنٹے جیل میں نہیں گزار سکتے۔ عمران خان نے ایجنسیوں کے بندے بٹھا کر ہمیں جیلوں میں اذیت دی۔ شیخ رشید کو میں نے خود نواز شریف کے پیچھے دم ہلاتے پھرتے دیکھا ہے۔