تفصیلات کے مطابق وزیراعظم عمران خان کی زیر صدارت وفاقی کابینہ کا اجلاس ختم ہوگیا، کابینہ نے بیشتر ایجنڈا آئٹمز نمٹا دیئے۔ اجلاس میں وفاقی وزیر امین الحق نے لاپتہ افراد کا معاملہ اٹھایا، وزیراعظم نے وزارت داخلہ کو معاملہ حل کرنے کی ہدایت کردی۔

ایم کیو ایم نے کراچی ٹرانسفارمیشن پلان اجلاس میں نہ بلانے پراعتراض کیا جس پر وزیراعظم نے کہا کہ اتحادی جماعت کو نظر انداز نہیں کیا جائے گا۔

وفاقی کابینہ کو کورونا کی صورتحال پر بریفنگ دی گئی۔ کابینہ نے کورونا کے باوجود اپوزیشن کے جلسوں پر تشویش کا اظہار کیا۔

وزیراعظم نے پی ڈی ایم جلسوں سے متعلق حکومتی پالیسی سے آگاہ کیا۔ وزیراعظم نے کہا کہ ہم انہیں روکیں گے نہیں، انہیں عوام کے سامنے ایکسپوز ہونے دیں۔

عمران خان نے مزید کہا کہ اپوزیشن عوام کی جانوں سے کھیل رہی ہے، عوام کو اپوزیشن کے غیر ذمہ دارانہ رویئے سے آگاہ کیا جائے گا۔

اجلاس میں معاونین خصوصی سے متعلق عدالت کے فیصلہ کا جائزہ بھی لیا گیا اور آئینی و قانونی پہلوؤں کا جائزہ لینے کیلئے لیگل ٹیم کو ہدایات جاری کردی گئیں۔