سائنس دانوں نے دنیا کا پہلا مصنوعی گوشت متعارف کرا دیا ہے جو تھری ڈی پرنٹر کی مدد سے بنایا گیا ہے۔

غیر ملکی ذرائع ابلاغ کے مطابق سائنس دانوں کی ٹیم نے یہ واگیو گائے گوشت لیب میں اسٹیم سیلز کا استعمال کرتے ہوئے بنایا ہے۔

رپورٹ کے مطابق اس سے قبل لیب میں بنائے گئے گوشت کی شکل "قیمے" کی طرز کی ہوتی تھی، تاہم اس بار تھری ڈی پرنٹر کی مدد سے اسٹیک گوشت بنایا گیا ہے۔

سائنس دانوں کی ٹیم نے تاحال گوشت بنانے کی لاگت اور کمرشل بنیادوں پر اس کے استعمال سے متعلق کوئی تبصرہ نہیں کیا ہے۔

واگیو بیف جاپانی گائے سے لیا جاتا ہے اور یہ دنیا بھر میں بہت مقبول ہے۔ خاص طور پر یہ یورپ اور امریکا میں اسٹیک پسند کرنے والوں کا پسندیدہ گوشت ہے۔

رپورٹ کے مطابق سائنس دانوں نے تھری ڈی پرنٹر کی مدد سے پٹھوں، چربی اور خون کی نسوں کے امتزاج والا گوشت بنایا ہے۔