سیکرٹری پنجاب اسمبلی محمد خان بھٹی کا کہنا ہے کہ شفاف اور منصفانہ الیکشن کے انعقاد کے لیے سیکرٹریٹ میں اراکین اسمبلی اور اسمبلی سٹاف کے مہمانوں کے داخلے پر مکمل پابندی ہو گی۔

محمد خان کا کہنا ہے کہ اسمبلی سیسشن کے دوران اسپیکر باکس، آفیسر باکس اور مہمانوں کی گیلریاں بند ہوں گی، تاہم میڈیا گیلری کھلی ہوگی۔

انہوں نے کہا کہ ایوان میں موبائل فون لے جانے پر پابندی ہو گی، اراکین اسمبلی سے گزارش ہے اسمبلی کی طرف سے جاری کردہ شناختی کارڈ ہمراہ رکھیں۔

سیکریٹری پنجاب اسمبلی نے کہا کہ اراکین اسمبلی کا داخلہ ڈیوٹی فری شاپ کی طرف واقع گیٹ سے ہوگا۔ پولیس، اسمبلی سیکرٹریٹ کی چار دیواری کے باہر انتظامی معاملات کنٹرول کرے گی۔

محمد خان بھٹی کے مطابق میڈیا پریس گیلری کے ذریعے وزیر اعلیٰ پنجاب کے الیکشن کی کوریج کرے گا۔