حکومت سندھ یونیورسٹیز اینڈ بورڈز ڈیپارٹمنٹ کی جانب سے جاری نوٹیفکیشن کے مطابق صوبے میں موسلا دھار بارشوں اور سیلاب سے متاثرہ افراد کی امداد کے لیے جامعات میں طلباء کی ٹیموں پرمشتمل فلڈ ریلیف کیمپ قائم کرنے کی ہدایت کی ہے۔

وزیرجامعات اسماعیل راہو نے کہا کہ تمام وائس چانسلرز (وی سیز) کو ہدایت کردی ہے کہ وہ جامعات میں فلڈ ریلیف مہم شروع کریں، جبکہ 27 سرکاری، نجی جامعات کو مراسلہ ارسال کیا گیا ہے۔

ان کا کہنا تھا کہ سندھ میں سیلاب متاثرین کے لیے جامعات فیکلٹی اور طلبہ فنڈز، کپڑے، خوراک اور دیگر سامان اکٹھا کریں، جبکہ جامعات میں ممکن ہوا تو میڈیکل کیمپس بھی قائم کیے جائیں گے۔

اسماعیل راہو نے کہا کہ طلبہ اور جامعات کے فیکلٹی ممبرز رضاکارانہ جذبے کے تحت اپنی خدمات انجام دے سکتے ہیں، جبکہ اس مشکل حالات میں متاثرہ بہن، بھائیوں کے ساتھ کھڑا ہونا ہمارا قومی فریضہ ہے۔

صوبائی وزیراسماعیل راہو نے سیکریٹری جامعات محمد مرید راھموں کو تمام وی سیز سے رابطے میں رہنے کی ہدایت کی ہے۔