سماجی رابطے کی ویب سائٹ ٹوئٹر پر جاری بیان میں شیخ رشید نے کہا کہ اسلام آباد کو گونتا موبے جیل بنادیا گیا ہے جو جیل ہمارے لیے کل بنائی ہے ، اس میں انہوں نے اور 70وزراء نے رہنا ہے۔

انہوں نے کہا کہ عمران خان پر حملہ کرنےوالےایک سے زیادہ منظم سازش کے آلہ کارتھے، اگر عمران خان کو کچھ ہوجاتا تو پاکستان ہی نہیں خطے کی سیاست بھی بدل جاتی ،آج 2 بجےلال حویلی میں احتجاجی جلسے سے خطاب کروں گا۔

اپنے ٹویٹ میں شیخ رشید نے مزید کہا کہ عمران خان پر قاتلانہ حملہ سنگین ترین سازش کی کڑی ہے ایک ملزم سےفوری بیان دلوانااورباقیوں کوفرار کرواناسوالیہ نشان ہے۔

عوامی مسلم لیگ کے سربراہ کا کہنا تھا کہ پی ڈی ایم سیاسی طور پر دفن ہوگئی ہے، عمران خان پر قاتلانہ حملہ غیر ملکی اور مقامی سازش ہے، امن اور قانون کے دائرے میں رہتے ہوئے اپناحق لے کر رہیں گے۔