شہباز شریف اور نواز شریف کے درمیان ملاقات میں پارٹی نائب صدر مریم نواز بھی شریک تھیں جس میں آرمی چیف کے تقرر سے متعلق بات چیت کی گئی۔

ذرائع کے مطابق ملاقات میں فیصلہ ہوا کہ سینئر ترین افسر کو آرمی چیف بنانے بنایا جائے گا اور پاکستان ڈیموکریٹک موومنٹ (پی ڈی ایم) قیادت کو بھی فیصلے پر اعتماد میں لیا جائے گا۔

اس موقع پر وزیراعظم شہباز شریف کا کہنا تھا کہ آرمی چیف کی تعیناتی آئینی معاملہ ہے جو آئین کے مطابق ہی کریں گے۔

ذرائع نے بتایا کہ ملاقات کے بعد شہباز شریف پاکستان کے لئے روانہ ہوگئے ہیں۔

دوسری جانب وزیردفاع خواجہ آصف نے وزیراعظم شہبازشریف اور قائد ن لیگ نوازشریف کی لندن میں ہونےوالی اہم ملاقات کی تصدیق کرتے ہوئے آرمی چیف کی تعیناتی کے حوالے سے سرگرم اطلاعات کو قیاس آرائیاں قراردے دیا ہے۔

اپنی ٹویٹ میں خواجہ آصف نے لکھا کہ، ”میڈیا میں قیاس آرائی ہورہی ہے کہ لندن میں نواز شہباز میٹنگ میں آرمی چیف کی تقرری کے حوالے سے کوئی فیصلہ ہواہے“۔

وزیردفاع کے مطابق نئے آرمی چیف کے تقرر پر مشاورت ضرور کی گئی ہےتاہم فیصلہ آئینی عمل کے بعد مشاورت سے ہوگا۔