خیبرپختونخوا اور پنجاب کے انتخابات کے حوالے سے الیکشن کمیشن کا اجلاس 20 فروری کو ہوگا۔

الیکشن کمیشن نے انتخابات سے متعلق صدر مملکت کے ساتھ مشاورت میں شامل ہونے سے معذرت کر لی۔

الیکشن کمیشن نے اپنے جواب میں لکھا کہ ہم صدر کے ساتھ مشاورت میں شریک نہیں ہو سکتے، مشاورت میں شرکت کا حتمی فیصلہ پیر کو اجلاس میں ہو گا۔

الیکشن کمیشن کی طرف سے جواب سیکرٹری نے صدر کو بھجوا دیا ہے۔

صدر مملکت نے الیکشن ایکٹ کی سیشن 57 کے تحت الیکشن کمیشن کو مشاورت کے لیے بلایا تھا۔

الیکشن کمیشن نے جواب میں یہ بھی کہا کہ الیکشن کمیشن ازخود انتخاب کی تاریخ مقرر نہیں کر سکتا، آئین کے مطابق صوبائی اسمبلی کا پول ڈے گورنر دے گا۔

پی ٹی آئی رہنما فواد چوہدری نے سماجی رابطے کی ویب سائٹ ٹوئٹر پر اپنے ٹویٹ میں کہا ہے کہ آئین کے آرٹیکل 46 کے تحت کوئی بھی انتظامی ادارہ صدر سے کوئی معلومات نہیں روک سکتا، اس لیے ای سی پی کو صدارتی حکم نامے سے انکار کرنے کا اختیار نہیں ہے کہ وہ اسے انتخابات کی صورتحال سے آگاہ کرے۔