سماجی رابطے کی ویب سائٹ ٹوئٹر پر جاری بیان میں شیخ رشید نے کہا کہ استعفیٰ دینے کی دیر تھی کہ نیب کے طلبی نوٹس کا جمعہ بازار لگ گیا ہے، صدر نے 9 اپریل الیکشن کی تاریخ دے کر حکومت کی بنیادیں ہلا دی ہیں۔

انہوں نے کہا کہ لطیف کھوسہ اور سلمان راجہ بھی کہتے ہیں صدر کا فیصلہ آئینی ہے، امید ہے عدلیہ صدر کے فیصلے کو آئینی اور قانونی قرار دے گی۔

شیخ رشید نے اپنے ٹویٹ میں مزید کہا کہ پاکستان آئی ایم ایف کا پانچواں اور ایشیاء کا پہلا مقروض ترین ملک ہے، 75 سالوں میں وزرائے خارجہ نے جتنے دورے کیے بلاول نے اکیلے کیے ہیں اور موج میلے منارہا ہے۔

سابق وزیر داخلہ کا کہنا تھا کہ وزیر پیٹرولیم آذربائیجان میں ادھار تیل اور ایل این جی کے لئے دھکے کھا رہا ہے۔ آٹا گھی نایاب اور حکومت نیب افسروں کی تبدیلیوں میں لگی ہوئی ہے آج جیل بھرو تحریک کا آغاز ہوگا۔

اپنے ٹویٹ میں سربراہ عوامی مسلم لیگ کے سربراہ نے مزید لکھا کہ آبپارہ پولیس نے پنجاب کے علاقے میں میرے گھر میں ڈکیتی کی اور میرا سامان چوری کیا اور پرچہ بھی مجھ پر دے دیا اپنی وردی بھی خود ہی پھاڑی۔

شیخ رشید نے کہا کہ عدالت میں ویڈیو کے ساتھ آبپارہ پولیس اور اس کے پیچھے چھپے چہرے کو بے نقاب کرکے پوسٹ مارٹم کروں گا، کل مری تاریخ پر بھی پیش ہوں گا اور میڈیا ٹاک بھی کروں گا۔