سائٹ سپر ہائی وے کےعلاقے جنجال گوٹھ میں تین نوجوانوں پر بدترین تشدد کی ویڈیو وائرل ہوئی تھی جبکہ تشدد کا نشانہ بننے والے انڈس ٹاؤن کے رہائشی ہیں۔

ایس ایس پی ایسٹ زبیر نذیرشیخ کے مطابق پولیس نے وائرل ویڈیو میں دکھائی دینے والے افراد کی نشاندہی کرتے ہوئے اب تک 8 ملزمان کو باقاعدہ گرفتار کرلیا ہے، جبکہ تشدد میں ملوث مزید ملزمان کی گرفتاری کے لیئے چھاپے مارے جارہے ہیں۔

اس سے قبل پولیس نے کارروائی کرتے ہوئے 5 ملزمان کو گرفتار کیا تھا۔

نوجوانوں پر تشدد کا واقعہ 5 اپریل کو پیش آیا تھا کچھ افراد نے لڑکوں کو پکڑا اور تشدد کا نشانہ بنایا، پھرعلاقہ پولیس کے سپرد کر دیا تھا۔

متاثرہ نوجوانوں کی شناخت عبدالکریم، محمد جمن اور آصف علی کے نام سے کی گئی اور بے گناہ ثابت ہونے پر 5 اپریل کو نوجوانوں کو چھوڑ دیا گیا تھا۔

دوسری جانب نوجوانوں پرتشدد کی ویڈیو وائرل ہونے کے بعد ایس ایس پی ایسٹ زبیر نذیر شیخ نے معاملے کا نوٹس لیا تھا، جس کے بعد واقعے کا مقدمہ سائٹ سپر ہائی وے تھانے پر درج کیا گیا تھا۔