روالپنڈی میں نیوزی لینڈ کو سیریز کے پہلے ون ڈے میں شکست دے کر قومی مینز کرکٹ ٹیم نے ون ڈے انٹرنیشنلز میں مجموعی طور پر 500 فتوحات مکمل کیں۔

قومی کھلاڑیوں ںے ڈریسنگ روم میں کیک کاٹ کر جشن منایا جبکہ پاکستانی ٹیم یہ اعزاز پانے والی دنیا کی تیسری ٹیم بن گئی۔

پاکستان کرکٹ ٹیم نے 500 فتوحات اپنے 949 ویں ون ڈے انٹرنیشنل میں مکمل کیں۔

پاکستان سے قبل آسٹریلیا اور بھارت پانچ، پانچ سو ون ڈے میچز جیت چکے ہیں۔

آسٹریلیا نے 978 میچز کھیل کر 594 ون ڈے انٹرنیشنلز میں کامیابی حاصل کی جبکہ بھارت نے 1029 میں سے 539 ون ڈے انٹرنیشنل میچز اپنے نام کیے۔

گرین شرٹس نے اب تک سری لنکا کے خلاف 92، بھارت کے خلاف 73 اور ویسٹ انڈیز کے خلاف 63، نیوزی لینڈ کے خلاف 57 اور زمبابوے کے خلاف 54 ون ڈے میچز میں کامیابی حاصل کی۔

اس کے علاوہ پاکستان نے آسٹریلیا کے خلاف 34، بنگلادیش اور انگلینڈ کے خلاف 32، 32 میچز جیتے ہیں۔