حکومتی اتحاد اور پی ٹی آئی کے مابین آج مذاکرات کی تیسری نشست بھی مکمل ہوگئی۔

سابق وزیرخارجہ شاہ محمود قریشی کا مذاکرات کے بعد میڈیا سے گفتگو میں کہنا تھا کہ بہت نیک نیتی سے مذاکرات کا حصہ بنے بہت لچک دکھائی۔

ان کا مزید کہنا تھا ہم نے فیصلہ کیا ہے جس نیک نیتی سے بیٹھے اب سپریم کورٹ کو اپنا مؤقف تحریری طور پر پیش کریں گے، ہماری خواہش ہے ہنجاب کے انتخابات 14 مئی کو ہوں۔

شاہ محمود قریشی کا کہنا تھا کہ مذاکرات کے دوران ہمارے کارکنان کو گرفتار کیا گیا، ہمارے پارٹی کے صدر پرویز الہٰی کے گھر جو کچھ ہوا وہ سب کے سامنے ہے۔

پی ٹی آئی رہنما کا کہنا تھا کہ خواجہ آصف کا بیان بھی سب کے سامنے ہے، انہوں نے ماحول کو پیچیدہ کیا، جاوید لطیف کی پریس کانفرنس نے بھی ماحول کو پیچیدہ کیا جبکہ مولانا فضل الرحمان بھی مذاکرات کے حق میں نہ تھے۔

شاہ محمود قریشی کا کہنا تھا کہ پی ٹی آئی کی ابتدائی پوزیشن تھی کہ 90 روز کے اندر پنجاب کے انتخابات ہوں جبکہ پی ڈی ایم چاہتی تھی تمام ملک میں سارے الیکشن ایک ساتھ ہوں۔