دفتر خارجہ کے مطابق جمعرات کو گوا پہنچنے کے بعد شنگھائی تعاون تنظیم کی سائیڈلائن پر بلاول بھٹو زرداری نے روس کے وزیر خارجہ سرگئی لاوروف سے ملاقات کی۔

بیان میں مزید کہا گیا ہے کہ ’ملاقات میں دونوں رہنماؤں نے علاقائی اور بین الاقوامی صورت حال سمیت باہمی دلچسپی کے امور پر تبادلہ خیال کیا۔‘

بیان میں مزید کہا گیا کہ ’پاکستانی اور روسی وزرائے خارجہ نے غذائی تحفظ، توانائی اور دونوں ممالک کے عوام کے درمیان رابطوں کے فروغ کے لیے قریبی تعاون پر اتفاق کیا۔‘

دفتر خارجہ کا کہنا ہے کہ ’شنگھائی تعاون تنظیم نے روس کے ساتھ تعاون اور ہم آہنگی کی نئی راہیں کھولی ہیں۔‘

گوا پہنچنے پر بلاول بھٹو نے ایک ٹویٹ میں کہا تھا کہ ’آج سب سے پہلے میری ملاقات روس کے وزیر خارجہ سے ہو گی اور اس کے بعد ازبکستان کے وزیر خارجہ سے ملوں گا۔‘