گزشتہ دنوں شان شاہد نے ایک تبصرے میں کہا تھا کہ45 سیکنڈ کے کمرشل میں اور ایک فلم بنانے میں بہت فرق ہے، یہ پروڈیوسر کی ذمہ داری ہے کہ بہتر ہدایت کار کو رکھے ۔

مزاحیہ اداکار اور ہدایتکار فیصل قریشی مفرد اور دلچسپ اشتہارات بنانے کے حوالے سے مشہور ہیں تاہم عید کے موقع پر بطور ہدایتکار ان کی پہلی فلم منی بیک گارنٹی ریلیز کی گئی ہے ۔

شان کے تبصرے پر اداکار مانی نے ایک پوسٹ کے زریعے جوابی وار کیا انہوں نے بدلے میں شان شاہد کی پرانی فلم کی ایک کلپ شیئر کی جس میں شان نماز پڑرہے ہوتے ہیں اور حملہ آور ان پر گولیاں چلاتا رہتا ہے لیکن انہیں گولی نہیں لگتی ۔

مانی نے لکھا کہ مذکورہ 45 سیکنڈ کی کلپ شان شاہد کی بلاک بسٹر فلم کی ہی ہے، جس میں گولی ان کے چہرے سے ایک انچ کی دوری سے گزر رہی ہے۔

مانی کے بعد اداکار شمعون عباسی نے بھی اپنے فیس بک پوسٹ کے زریعے شان کو تنقید کا نشانہ بنایا ۔

اداکار شمعون عباسی نے اپنے فیس بک پوسٹ میں لکھا کہ مجھے لگتا ہے کہ کسی بھی فلم کی تنقید کرنے سے پہلے شان شاہد کو اپنی گزشتہ کچھ سالوں کی فلموں پر بھی توجہ دینی چاہئےجو باکس آفس پر اچھی کارکردگی نہیں دکھا سکیں اور صرف 3 دنوں میں سینما گھر سے ہٹا دی گئیں۔

انہوں نے مزید کہا کہ فلم دادل ، منی بیک گارنٹی اور ہوئے تم اجنبی جیسی فلمیں ابھی بھی سینما گھروں میں لگی ہوئی ہیں اور کچھ آمدنی حاصل کر رہی ہیں۔

اس کے بعد آج فیصل قریشی نے اپنے ٹوئٹر اکاؤنٹ سے شان شاہد کے تبصرے کو ری ٹوئٹ کرتے ہوئے لکھا کہ وہ شان کی رائے کا احترام کرتے ہیں۔

ساتھی فنکاروں کے ساتھ ساتھ سوشل میڈیا صارفین بھی شان کو تنقید کا نشانہ بنارہے تھے کہ اسی دوران آج انہوں نے ایک اور ٹوئٹ کی اس معاملے کی آگ پانی ڈالنے کی کوشش کی ۔

شان نے اپنی تازہ ٹوئٹ میں لکھا کہ ہمیں پاکستانی فلموں کو سپورٹ کرنا چاہیے، یہ ہماری اپنی ہیں اپنی کہانیوں کا ارتقا اور فلمیں بنانے کا یہ سلسلہ نہیں رکنا چاہیے ساتھ ہی انہوں نے ہوئے تم اجنبی اور منی بیک گارنٹی فلموں کا ٹیگ استعمال کیا۔