قائمہ کمیٹی برائے قوائد و ضوابط و استحقاق کا ان کیمرہ اجلاس ہوا، جس میں توہین پارلیمنٹ بل 2023 منظوری کے لئے پیش کیا گیا، تاہم کمیٹی بل کی منظوری نہ دے سکی، اور توہین پارلیمنٹ بل پر آئندہ ہفتے دوبارہ اجلاس بلانے کا فیصلہ کیا گیا۔

چیئرمین کمیٹی رانا قاسم نون نے اس حوالے سے بتایا کہ تمام ممبران توہین پارلیمنٹ بل پر متفق ہیں، بل کو مزید غور کے لئے منظوری مؤخر کی ہے۔

رانا قاسم نون کا کہنا تھا کہ قومی اسمبلی آئندہ ہفتے یہ بل منظور کر لے گی، سیاسی جماعتوں کے پارلیمانی لیڈرز سے توہین پارلیمنٹ بل پر مشاورت کی ہے۔

واضح رہے کہ 9 مئی کو اسپیکر راجہ پرویز اشرف کی زیر صدارت ہونے والے قومی اسمبلی کے اجلاس میں چیئرمین استحقاق کمیٹی رانا قاسم نون نے توہین پارلیمنٹ کے بل کی تحریک ایوان میں پیش کیا تھا۔

حکومت نے توہین پارلیمنٹ بل کی حمایت کردی اور بل کو مزید غور کے لیے کمیٹی کو بجھوانے کی تجویز دی تھی۔