ذرائع کا کہنا ہے کہ پیپلزپارٹی حلیم عادل شیخ کواپوزیشن لیڈرسے ہٹانے کے لئے لابنگ کر رہی ہے جب کہ متحدہ قومی موومنٹ پاکستان (ایم کیو ایم) اور گرینڈ دیموکریٹک الائنس (جی ڈی اے) اپوزیشن لیڈر کی خواہش مند ہیں۔

ذرائع کے مطابق ایم کیو ایم کا مؤقف ہے کہ خاتون اپوزیشن لیڈر بنا کر ہم تاریخ رقم کرنا چاہتے ہیں جس کے جواب میں جی ڈی اے نے کہا کہ غیر مسلم یا عورت کو ہم بھی اپوزیشن لیڈر بنا سکتے ہیں۔

ذرائع نے بتایا کہ جی ڈی اے نے متحدہ کو بھیجے پیغام میں کہا کہ سینیٹ میں ایم کیو ایم امیدوار ہماری حمایت سے جیتا، وقت آگیا ہے ہمارا احسان اُتارا جائے۔

ذرائع کے مطابق پی ٹی آئی کے 30 ارکان میں سے چار منحرف ہو چکے ہیں جب کہ پی پی چاہتی ہے اپوزیشن لیڈر کو آئینی طریقے سے ڈی نوٹیفائی کیا جائے۔

واضح رہے کہ سندھ اسمبلی میں ایم کیو ایم کے 21 اور جی ڈی اے کے 14 ارکان ہیں۔