سماجی رابطے کی ویب سائٹ ٹوئٹر پر جاری بیان میں سابق وزیراعظم عمران خان نے کہا کہ موجودہ فاشسٹ سیٹ اپ نے جمہوریت، عدلیہ اور آئین کو مذاق بنادیا، شیریں مزاری کو ضمانت کے بعد پھر گرفتار کرلیا گیا۔

انہوں نے کہا کہ ہمارے 7500 گرفتار کارکنوں میں سے زیادہ ترعدالتوں میں پیش نہیں کیے گئے، اس وقت گھروں میں گھس کر خواتین اور مردوں کا اٹھایا جارہا ہے۔

عمران خان کا مزید کہنا تھا کہ معیشت اور انسانی حقوق کے حوالے سے ہم پستی میں ڈوب گئے، یہ سب کچھ پی ٹی آئی کو اگلی حکومت بنانے سے روکنے کے لیے ہے۔

اپنے ویڈیو پیغام میں چیئرمین پی ٹی آئی کا کہنا تھا کہ اپنی فوج سے کون لڑنا چاہتا ہے، فوج کو کمزور کرنے کا مطلب خود کو کمزور کرنا ہے، فوج پر اپنے بچوں کی طرح اصلاح کرنے کے لیے تنقید کرتا ہوں، مجھے عالمی سطح پر پاک فوج کا دفاع کرنے پر فخر ہے۔

انہوں نے مزید کہا کہ میں نے کبھی کسی کی غلامی نہیں کی، پی ڈی ایم فوج اور پی ٹی آئی کو لڑانا چاہتی ہے، 40 دہشت گرد میرے گھر میں ہیں تو ضرور آئیں لیکن وارنٹ لے کر آئیں۔

عمران خان کا کہنا تھا کہ پاکستان تحریک انصاف ہمیشہ سے ایک پرامن اور جمہوری جماعت ہے، میرا حکام سے مطالبہ ہے کہ سرکاری عمارتوں پر کیے جانے والے کسی بھی حملے کی شفاف تحقیقات کریں، یہ سب تحریک انصاف کو پھانسنے کا سوچا سمجھا منصوبہ ہے۔

ایک اور ٹویٹ میں سابق وزیراعظم کا کہنا تھا کہ میرا ملک چھوڑنے کا سوال ہی پیدا نہیں ہوتا، میں آخری سانس تک اپنے ملک میں رہوں گا۔