سماجی رابطے کی ویب سائٹ ٹویٹر پر اپنی ٹویٹ میں وزیراعظم شہبازشریف کا کہنا تھا کہ میں 9 مئی کے شرمناک، المناک اور افسوسناک واقعات کے بعد سے ان کے منفی اثرات و مضمرات کے بارے سوچ رہا ہوں۔

وزیراعظم نے کہا کہ میں اس سیاہ دن کے بارے میں جتنا سوچتا ہوں اتنا ہی میرے غم و غصے میں اضافہ ہوتا جا رہا ہے، کہ ہم پاکستان کے نظریے کے خود ہی دشمن بن گئے ہیں۔ عوام کو تقسیم کرنے کے بعد عمران نیازی ریاستی اداروں کی تحقیر کی کوشش میں مگن ہوگیا۔

شہبازشریف کا کہنا تھا کہ جب عمران خان کی حکومت کے حصول کی تمام تر کوششیں ناکام ہو گئیں، تو وہ اپنے نفرت انگیز بیانیے اور بلوائیوں کے جتھوں سے ریاست پاکستان پر حملہ آور ہو گیا، لیکن اسے شاید اس بات کا اندازہ نہیں تھا کہ نظریہ پاکستان اس کے ناپاک اور خود غرضی سے بھرپور عزائم سے کہیں معتبر اور توانا ہے، اسے ضرور ناکامی کا سامنا ہوگا۔