وفاقی حکومت نے آئندہ 15 روز کے لئے پٹرول اور ڈیزل کی قیمتوں کو برقرار رکھنے کا فیصلہ کیا ہے۔

وزیرخزانہ اسحاق ڈار نے مختصر پریس کانفرنس کرتے ہوئے بتایا کہ ، عالمی منڈی میں گیس اور تیل کی قیمتوں میں تھوڑا سا اضافہ ہوا ہے، اوگرا نے جو تجاویز دیں اس کے مطابق ڈیزل اور پیٹرول کی قیمتیں برقرار رکھنے کا فیصلہ کیا۔

وزیر خزانہ اسحاق ڈار نے بتایا کہ ایک ماہ کے دوران پیٹرول کی قیمت میں20 روپے اور ڈیزل کی قیمت میں 35 روپے فی لیٹر کمی کی گئی، لہٰذا قیمتوں میں کوئی ردوبدل نہیں کیا جارہا، اور یہی قیمتیں 30 جون تک برقرار رہیں گی۔

واضح رہے کہ اس وقت پیٹرول کی موجودہ قیمت 262 روپے فی لیٹر، ہائی اسپیڈ ڈیزل کی فی لیٹر قیمت 253 روپے جب کہ مٹی کے تیل کی قیمت 164روپے7 پیسے ہے، جو آئندہ 15 روز کے لئے برقرار رہے گی۔