شرجیل میمن نے ٹویٹ میں لکھا کہ شارع فیصل پر پیپلز بس سروس کے لئے مخصوص لین بنائی جا رہی ہے، پبلک ٹرانسپورٹ شہر کی اہم راستوں سے بغیر کسی رکاوٹ کے گزرنی چاہئے۔

صوبائی وزیر اطلاعات نے اپنے ٹوئٹ میں مزید لکھا کہ محکمہ ٹرانسپورٹ کی جانب سے مخصوص لین کا کام مکمل کیا جا رہا ہے۔

شرجیل میمن نے ایک ویڈیو بھی شیئر کی جس میں شارع فیصل پر پینٹ کر رہے ہیں۔ سندھ انفارمیشن ڈیپارٹمنٹ کی جانب سے جاری کی گئی تصاویر سے ظاہر ہوتا ہے کہ یہ پینٹ شارع فیصل پر ایک بس اسٹاپ کیلئے مختص جگہ پر کیا گیا ہے۔

واضح رہے کہ پیپلز بس سروس کا آغاز داؤد چورنگی سے ٹاور کے روٹ پر کیا گیا تھا۔ جس سے شہریوں کو بہتر سفری سہولیات میسر آرہی ہیں تاہم اب سندھ کے وزیر اطلاعات شرجیل میمن نے پیپلز بس سروس کے لیے شارع فیصل پر مخصوص لین کے نفاذ کا اعلان کردیا ہے۔

اس فیصلے کے نتیجے میں جہاں ایک جانب پیپلز بس سروس سے سفر کرنے والے شہری جلد سے جلد اپنی منزل تک پہنچ پائیں گے تو وہیں دوسری جانب شاہراہ فیصل پر دیگر گاڑیوں کے لیے دستیاب لینز کم ہونے سے ٹریفک کے مسائل پیدا ہو سکتے ہیں۔