ڈپٹی کمشنر چکوال قرات العین ملک نے بتایا کہ بس کو حادثہ بریک فیل ہونے کے باعث پیش آیا۔

قرات العین ملک نے ٹویٹر پر جاری پیغام میں بتایا کہ ’اموات کی تعداد 12 تک پہنچ چکی ہے، مرنے والوں میں 3 خواتین اور 2 بچے بھی شامل ہیں، بس میں مجموعی طور پر 34 مسافر سوار تھے، 22 افراد زخمی ہوئے، 7 کو حالت نازک ہونے کی وجہ سے راولپنڈی منتقل کیا جاچکا ہے‘۔

دوسری جانب ذرائع کے مطابق 15 زخمیوں کو ٹراما سنٹر منتقل کردیا گیا ہے۔

چکوال ٹریفک حادثہ: نگراں وزیراعلیٰ پنجاب کا اظہار افسوس

نگراں وزیراعلیٰ پنجاب محسن نقوی نے چکوال کے قریب موٹروے پر ٹریفک حادثے میں قیمتی انسانی جانوں کے ضیاع پر افسوس کا اظہار کیا ہے۔

نگراں وزیراعلیٰ پنجاب نے جاں بحق افراد کے لواحقین سے دلی ہمدردی اور تعزیت کا اظہار کرتے ہوئے کہا کہ جاں بحق افراد کے لواحقین کے غم میں برابر کے شریک ہیں۔

محسن نقوی نے انتظامیہ کو ہدایت کی کہ زخمیوں کو علاج معالجے کی بہترین سہولتیں فراہم کی جائیں۔

نگران وزیراعلیٰ محسن نقوی نے کمشنر راولپنڈی ڈویژن اور آر پی او راولپنڈی سے افسوسناک واقعے کے بارے میں رپورٹ طلب کرلی۔