دو روز شارع فیصل تھانے کی حدود میں واقع نجی ہاؤسنگ سوسائٹی سے چوری ہونے والا بیل متاثرہ شہری نے ڈھونڈ نکالا۔

جانور کے مالک حسن کا کہنا ہے کہ میں نے اپنی مدد آپ کے تحت قربانی کا جانور ڈھونڈا ہے، میری خوشی دیدنی ہے۔

حسن نے بتایا کہ میرا قربانی کا جانور اتوار کی صبح سینٹرل گورنمنٹ ایمپلائیز کوآپریٹو ہاؤسنگ سوسائٹی سے نامعلوم ملزمان چوری کرکے لے گئے تھے۔

چوری کی واردات کی سی سی ٹی وی فوٹیج منظر عام پر بھی آئی تھی۔

متاثرہ شہری نے کہا کہ میں نے شہریوں سے اپنا قربانی کا جانور ڈھونڈنے کے لیے ویڈیو بنا کر سوشل میڈیا پر وائرل کی تھی۔

آج صبح سویرے لیاقت آباد کے علاقے کے رہائشی سلیمان نے اطلاع دی کہ آپ کا بیل ہمارے گھر کے پاس ہے۔ میں نے اپنے قربانی کے جانور کو پہچانا اور شہریوں کا شکریہ ادا کیا۔

دوسری جانب لیاقت آباد کےرہائیشی سلیمان نے بتایا کہ میں صبح سویرے اپنے گھر کے باہر بیٹھ کر سوشل میڈیا استعمال کر رہا تھا، میں نے پوسٹ دیکھی اور فوراً بھائی کو اپنے پاس بلا کر اس کی گائے حوالے کی۔

شارع فیصل تھانے کی انویسٹیگیشن ٹیم بھی موقع پر پہنچ گئی۔

پولسی کا کہنا ہے کہ شہری حسن کو اس کے عید قرباں کا جانور حوالے کر دیا ہے، جانور چوری کرنے والے کون لوگ تھے، تفتیش جاری ہے۔