ماڈل ٹاؤن لاہور میں پریس کانفرنس کرتے ہوئے پیپلز پارٹی سینٹرل پنجاب کے قائم مقام صدر رانا فاروق سعید نے کہا کہ لطیف کھوسہ سے کہا تھا ریڈلائن کراس نہ کریں لیکن انہوں نے پارٹی کی ریڈ لائن کراس کی۔

رانا فاروق سعید نے الزام لگایا کہ لطیف کھوسہ بطور وکیل پیپلز پارٹی میں آئے اور مراعات بھی لیتے رہے، وہ اپنے بیٹے کو اٹارنی جنرل لگوانا چاہتے تھے لیکن یہ عہدہ نہ ملنے پر بلیک میلنگ شروع کردی۔

پیپلز پارٹی سینٹرل پنجاب کے قائم مقام صدر کا کہنا تھا کہ لطیف کھوسہ کی بنیادی رکنیت ختم کر رہے ہیں۔

اس موقع پر پیپلز پارٹی سینٹرل پنجاب آفس میں ’وال آف شیم‘ کا افتتاح بھی کیا گیا جس میں لطیف کھوسہ کی تصویر لگائی گئی تھی۔

دوسری جانب پیپلز پارٹی سینٹرل پنجاب کے قائم مقام صدر نے نجی ٹی وی سے بات کرتے ہوئے بتایا کہ معروف قانون دان اور پیپلزپارٹی کے رہنما اعتزازاحسن کی بھی پارٹی رکنیت خارج کردی گئی ہے۔

واضح رہے کہ دونوں رہنما مختلف ٹی وی شوز اور میڈیا سے بات کرتے ہوئے حکومت پر تنقید کرتے نظر آتے ہیں۔