واشنگٹن میں امریکی صدر جوبائیڈن سے بھارتی وزیراعظم نریندر مودی کی ملاقات کے اعلامیہ میں ممبئی اور پٹھان کوٹ حملوں میں ملوث عناصر کو کٹہرے میں لانے کا مطالبہ کیا گیا۔

مشترکہ اعلامیہ میں اقوام متحدہ کی فہرست میں شامل تمام دہشت گرد گروہوں کے خلاف کارروائی کا بھی کہا گیا۔ دونوں رہنماؤں نے سرحد پار دہشتگردی کی بھی مذمت کی۔

اعلامیہ میں پاکستان پر زور دیا گیا کہ وہ یقینی بنائے کہ اس کے زیر اثر کوئی بھی علاقہ دہشت گرد حملوں کے لیے استعمال نہ ہو، واضح کیا گیا کہ امریکا اور بھارت عالمی دہشتگردی کا مقابلہ کرنے کے لیے ایک ساتھ کھڑے ہیں۔

مودی کے خلاف احتجاج

امریکی صدر اوربھارتی وزیراعظم کی ملاقات کے دوران وائٹ ہاؤس کے باہر سکھوں نے احتجاج کیا۔ مظاہرین نے انڈیا شیم شیم اور گو بیک مودی کے نعرے لگائے۔

مظاہرے کے دوران مختلف ٹرک لائے گئے جن پر مودی کے خلاف نعرے درج تھے، سکھوں نے ٹرکوں پر اسکرین کے ذریعے مودی مخالف دستاویزی فلم بھی دکھائی۔