حکومت نے 15 روز کے لیے ڈیزل کی قیمت میں ساڑھے 7 روپے فی لیٹر اضافے اور پیٹرول کی قیمت برقرار رکھنے کا اعلان کردیا۔

اسلام آباد میں میڈیا سے گفتگو کرتے ہوئے وزیر خزانہ اسحاق ڈار کا کہنا تھا کہ پیٹرول کی قیمت میں کسی قسم کا اضافہ نہیں کیا جا رہا، پیٹرول کی قیمت برقرار رہے گی۔

انہوں نے کہا کہ عالمی منڈی میں تیل کی قیمت میں کافی اضافہ ہوا ہے اس لیے آج سے 15 جولائی کی رات تک ڈیزل کی قیمت میں ساڑھے 7 روپے کا اضافہ کیا گیا ہے۔

وزیر خزانہ کا کہنا تھا کہ پیٹرولیم مصنوعات کی نئی قیمتوں میں ردو بدل کا اطلاق رات 12 بجے سے ہو گا، پیٹرولیم مصنوعات کی قیمتیں اگلے 15 روز کے لیے برقرار رہیں گی۔

اسحاق ڈار نے مزید کہا کہ آئل اینڈ گیس ریگولیٹری اتھارٹی نے قیمتیں کم سے کم رکھنے کی سفارش کی تھی جس پر وزیراعظم سے مشاورت کے بعد فیصلہ کیا گیا۔

اس سے قبل 15 جون کو وزیرخزانہ اسحاق ڈار نے مختصر پریس کانفرنس کرتے ہوئے بتایا تھا کہ عالمی منڈی میں گیس اور تیل کی قیمتوں میں تھوڑا سا اضافہ ہوا ہے، اوگرا نے جو تجاویز دیں اس کے مطابق ڈیزل اور پیٹرول کی قیمتیں برقرار رکھنے کا فیصلہ کیا۔