پاکستان نیشنل پولیو لیبارٹری کی ماحولیاتی نمونے میں پولیو وائرس کی تصدیق ہوگئی ہے، اور اس تصدیق کے بعد پولیو وائرس سیمپلز کی تعداد 11 ہو چکی ہے۔

رپورٹ کے مطابق پاکستان میں رواں برس میں اب تک بنوں سے ایک پولیو کیس رپورٹ ہوچکا ہے۔

رپورٹ میں بتایا گیا ہے کہ پشاور کے ماحولیاتی نمونے سے ملنے والے پولیو وائرس کے سیمپلز کی تعداد 4 ہو گئی ہے، اور اب تک پاکستان میں رپورٹ ہونے والے مجموعی ماحولیاتی نمونوں میں سے 5 نمونے افعانستان کے جینیاتی نمونوں سے مشابہ ہیں۔

پولیو وائرس کے ماحولیاتی نمونے پاکستان میں افعانستان سے کراس باڈر ایکٹو ٹرانسمشن کا واضح ثبوت ہیں، ملنے والے پولیو سیمپلز نے کراس باڈر متعلقہ اداروں کی کارکردگی پر بھی سوالات کھڑے کردیئے ہیں۔

ماہرین کا کہنا ہے موسم گرما پولیو وائرس کے پھیلاؤ کے لیے سازگار ہوتا ہے، لیکن گرمی کے موسم کے آغاز میں پولیو وائرس کا پایا جانا تشویشناک ہے۔

واضح رہے کہ عالمی طور پر 2023 کو پولیو کےخاتمے کا ہدف قرار دیا گیا ہے۔