سابق وزیراعظم اور مسلم لیگ ن کے قائد نواز شریف کی پلاٹ الاٹمنٹ کيس ميں بريت پر وزیراعظم شہبازشریف نے اظہار تشکر کرتے ہوئے کہا کہ نوازشریف کومبارک دیتا ہوں،کہ اللہ تعالی نے جھوٹ پر مبنی ایک اور مقدمے میں انہیں سرخرو کیا۔

شہبازشریف کا کہنا تھا کہ نوازشریف کے ساتھ سیاسی مقاصد کی خاطر ظلم اور زیادتی کی گئی، عدالت نے تسلیم کیا ہے قائد ن لیگ حکومت کی اجازت سےبیرون ملک گئے، اور ملک میں ہوتے تو تفتیش کاحصہ بنتے، اللہ کا شکر ہے کہ نوازشریف کو انصاف ملا ہے۔

واضح رہے کہ آج لاہورکی احتساب عدالت نے نواز شریف کی پلاٹ الاٹمنٹ کيس ميں بريت کا تفصيلی فيصلہ جاری کرتے ہوئے ریمارکس دیے ہیں کہ سابق وزیراعظم کو سیاسی انتقام کا نشانہ بنایا گیا۔

فیصلے میں کہا گیا ہے کہ نوازشریف کو اشتہاری قرار دینے کی کارروائی قانون کے مطابق نہیں ہے۔ ریکارڈ سے پتہ چلتا ہے نواز شریف کو سیاسی انتقام کانشانہ بنایا گیا، عدالت تین بار منتخب ہونے والے وزیراعظم نواز شریف کو بری کرنے کا حکم دیتی ہے۔