وزیراعظم شہباز شریف سے سعودی سفیر نواف بن سعید احمد المالکی کی اسلام آباد میں ملاقات ہوئی۔

وزیراعظم نے آئی ایم ایف کے ساتھ معاہدے کی منظوری کے لیے سعودی عرب کے غیر مشروط تعاون پر سعودی سفیر سے اظہار تشکر کیا۔

شہباز شریف نے سعودی سفیر کو اسپیشل انویسٹمینٹ فیسیلیٹیشن کونسل سے بھی آگاہ کیا۔

وزیرِ اعظم اور سعودی سفیر نے پاکستان اور سعودی عرب کے مابین مثبت سفارتی تعلقات کے تسلسل پر باہمی اطمینان کا اظہار کیا۔

واضح رہے کہ سعودی عرب کی جانب سے صبح اسٹیٹ بینک آف پاکستان کے اکاؤنٹ میں دو ارب ڈالرز جمع کرائے گئے جس کے بعد زرمبادلہ کے ذخائر 11.6 ارب ڈالرز تک پہنچ گئے۔

زرمبادلہ کے ذخائر بہتر ہونے اور سعودی عرب سے فنانسنگ ہونے پر انٹربینک اور اوپن مارکیٹ میں ڈالر کی قیمت میں کمی بھی ہوئی۔