شہر قائد میں تشدد کا ایک اور افسوسناک واقعہ پیش آیا۔ جس میں شہری جان سے ہاتھ دھو بیٹھا۔

متاثرہ شخص پر تشدد کی ویڈیو سوشل میڈیا پر وائرل ہوئی۔ جس میں متعدد افراد شہری پر تشدد کرتے دکھائی دے رہے ہیں۔ متاثرہ شخص پر ڈنڈوں اور بیلٹ سے تشدد کیا گیا۔

شہری پر تشدد کی اطلاع ملنے پر پولیس جائے وقوعہ پر پہنچی تو ملزمان تشدد کے بعد متاثرہ شخص کو دفتر میں بند کرکے چلے گئے تھے۔

متاثرہ شخص بند دفتر میں تشدد سے جاں بحق ہوگیا، مقتول کی شناخت عدیل کے نام سے ہوئی۔

ایس ایس پی سینٹرل معروف عثمان نے میڈیا کو بتایا کہ واقعہ کا مقدمہ سر سید تھانے میں بہن کی مدعیت میں 8 افراد کیخلاف درج کیا گیا۔

ایف آئی آر میں خاتون کا کہنا ہے کہ بھائی پر بہیمانہ تشدد کیا گیا، ہاتھوں اور پیروں کی انگلیاں توڑ دی گئیں۔

پولیس نے ویڈیو میں نظر آنے والے 4 افراد کو گرفتار کرلیا ہے۔

پولیس نے ابتدائی طور پر بتایا کہ متاثرہ شخص اور بااثر افراد میں مبینہ طور پر پیسے کے لین دین کا تنازع چل رہا تھا۔

ایس ایچ او سر سید کے مطابق پولیس نے جائے وقوعہ سے شواہد اکٹھے کرلیے ہیں، جبکہ واقعے میں ملوث مزید 4 ملزمان کی تلاش جاری ہے۔