کراچی کےعلاقے نارتھ ناظم آباد میں شہری نے ڈکیتی کو کوشش ناکام بنادی، تاہم مزاحمت پر فائرنگ سے راہ گیر زخمی ہوگیا۔

پولیس کے مطابق ذیشان نامی شہری بینک سے 19 لاکھ روپے لے کر نکلا تو خاتون سمیت تین ملزمان نے اسے لوٹنے کی کوشش کی۔

پولیس حکام نے بتایا کہ شہری ذیشان نے مزاحمت کرتے ہوئے ڈاکوؤں پر فائرنگ کردی، جس پر ڈاکوؤں نے بھی جوابی فائرنگ کی جس سے ایک راہ گیر زخمی ہو گیا، اور دو ملزمان فرار ہوگئے، تاہم ڈاکوؤں کی خاتون ساتھی عوام کے ہتھے چڑھ گئی۔

واقعے کی اطلاع ملتے ہی پولیس موقع پر پہنچ گئی، اور خاتون کو گرفتار کرکے تفتیش کے لئے نارتھ ناظم آباد تھانے منتقل کردیا، ملزمہ کے بیگ سے موٹر سائیکل کی نمبر پلیٹ برآمد ہوا ہے۔

دوران تفتیش ملزمہ نے ڈکیتی میں بینک مینجر کے ملوث ہونے کا انکشاف کیا ہے، اور بتایا کہ ساتھی ملزمان میں فرمان اور رشید شامل ہیں، گزشتہ ہفتے 50 ہزار روپے کی ڈکیتی کی تھی، 10 ہزار مجھے ملے تھے۔

ملزمہ نے تفتیش میں بتایا کہ میں غازی گوٹھ میں کرائے کے مکان میں رہتی ہوں، اور والد جیل میں ہیں۔