فردوس عاشق اعوان نے اپنے ٹوئٹ میں کہا کہ صدر عارف علوی کے ٹویٹ نے پاکستان کے سپریم آفس کے وقار و تشخص کو بری طرح مجروح کیا ہے جس کی جتنی مذمت کی جائے کم ہے۔

انھوں نے کہا کہ صدر کا عہدہ پاکستان کی سالمیت اور آئین کے تحفظ کے ساتھ وفاق کی مضبوطی اور مرکزیت کی علامات سمجھا جاتا ہے، صدر کے ٹویٹ سے دنیا بھر میں پاکستان کا انتہائی منفی پیغام گیا ہے کہ شاید پاکستان میں کوئی دستاویز محفوظ نہیں اور کوئی مراسلہ قابل اعتبار نہیں کہ اس پہ دستخط اصلی ہیں یا جعلی؟

ترجمان استحکام پاکستان پارٹی نے مزید کہا کہ صدر علوی کی اس عہدے کے منافی اور منصب کو داغدار کرنے والی ٹویٹ پر ان کے خلاف آرٹیکل 6 کے تحت کارروائی ہونی چاہئے۔ ان کے ٹویٹ کے پیچھے چھپی سوچ چیخ چیخ کر کہہ رہی ہے کہ ”صدر مملکت اب غدار سلطنت بن چکے ہیں“۔

واضح رہے کہ صدر پاکستان عارف علوی نے سماجی رابطے کی ویب سائٹ ٹویٹر پر اعلان کیا کہ انہوں نے آفیشل سیکریٹ ترمیمی بل اور پاکستان آرمی ترمیمی بل پر دستخط ہی نہیں کیے، اور اپنے اسٹاف سے یہ بل واپس بھیجنے کا کہا تھا، لیکن عملے نے میری خواہش سے انحراف اور حکم عدولی کی۔

صدر مملکت کی اس ٹوئٹ کے بعد سے سیاسی رہنماؤں کی جانب سے ڈاکٹر عارف علوی سے استعفیٰ کا مطالبہ کرنے کے ساتھ ان کے خلاف کارروائی کیے جانے پر زور دیا جارہا ہے۔