پولیس کے مطابق گوجرانوالا کے علاقے عثمان پارک کی رہائشی 12 سالہ بچی نے 15 پر کال کی۔

بچی نے فون پر بتایا کہ والد ٹریفک حادثے میں زخمی ہو گئے ہیں اور چھوٹے بہن بھائی بھوکے ہیں۔

پولیس ذرائع کے مطابق تھانہ سیٹلائٹ ٹاؤن کی پولیس وین کو متعلقہ پتے پر بھجوایا گیا، تو معلوم ہوا کہ گھر میں بچی کے ساتھ اس کے چار چھوٹے بہن بھائی، زخمی والد اور والدہ تھیں۔

ایس ایچ او تھانہ سیٹلائٹ ٹاؤن کا کہنا ہے کہ میری جیب میں جتنے پیسے تھے اس سے راشن لے کر بچی کے گھر دے آیا ہوں۔

بچی سے جب پوچھا گیا کہ پولیس ہیلپ لائن پر کال کرنے کا خیال کیسے آیا؟ تو اس نے بتایا کہ اس نے ٹی وی پر دیکھا تھا کہ پولیس والے راشن دے رہے ہیں۔

خیال رہے کہ گزشتہ دنوں لیہ اور اسلام آباد میں بھی بچوں کی بھوک، تنگدستی اور مہنگائی سے تنگ افراد نے ون فائیو کو مدد کیلئے فون کیا تھا، جس کے بعد پولیس حکام کی جانب سے ان کی مدد کی گئی تھی۔