امریکی قونصل جنرل اور محسن نقوی کی ملاقات میں دو طرفہ تعلقات اور مختلف شعبوں میں تعاون بڑھانے پر تبادلہ خیال کیا گیا۔

امریکی قونصل جنرل نے پنجاب حکومت کے تاریخی عمارتوں کی بحالی کیلئے اقدامات کو سراہا۔

اس موقع پر کرسٹین کے ہاکنز نے کہا کہ پنجاب حکومت ثقافتی ورثہ کومحفوظ بنانے کیلئے کام کررہی ہے۔

ان کا کہنا تھا کہ پنجاب حکومت کے ساتھ مختلف شعبوں میں تعاون کو مزید فروغ دیں گے۔

ملاقات کے موقع پر نگراں وزیر اعلیٰ پنجاب محسن نقوی کا کہنا تھا کہ مذہبی اور تاریخی عمارتوں کی بحالی کیلئے جامع پلان مرتب کیا ہے۔

انھوں نے کہا کہ پاکستان میں اقلیتوں سمیت تمام شہریوں کو آئین کے مطابق یکساں حقوق حاصل ہیں۔

محسن نقوی نے مزید کہا کہ حکومت لوگوں کی فلاح و بہبود کو محور بنا کر یکساں ترقی کے ایجنڈے پر عمل پیرا ہے۔

ملاقات کے موقع پر صوبائی وزیر اطلاعا ت و ثقافت عامر میر، ایڈیشنل چیف سیکرٹری داخلہ، ڈپٹی کمشنر لاہور اور امریکی قونصلیٹ کے حکام بھی موجود تھے۔