ایندھن نہ ملنے پر پی آئی اے کا فلائٹ آپریشن بری طرح متاثر ہوگیا ہے، 24 گھنٹوں میں قومی ایئرلائن کی 20 پروازیں منسوخ ہوچکی ہیں۔

ذرائع کا کہنا ہے کہ بیرون ملک سے آنے والے 2 ہزار سے زائد مسافروں کو مشکلات کا سامنا ہے، جب کہ اندرون ملک پروازوں کی تاخیر پر ایک ہزار سے زائد مسافر متاثر ہوئے ہیں۔

ذرائع کے مطابق عمرے کے لیے جانے والے معتمرین احرام کی حالت میں کئی گھنٹوں سے ایئرپورٹ پر پھنسے رہے۔

ذرائع نے بتایا کہ مالیاتی مسائل میں گھرا قومی ادارہ پی آئی اے پاکستان اسٹیٹ آئل (پی ایس او) کو ادائیگیاں نہیں کرسکا،

وزارت مذہبی امور نے حج آپریشن 2023ء کے ٹکٹوں کی مد میں ادائیگیاں کرنی تھیں، تاہم وزارت مذہبی امور کی جانب سے بھی پی آئی اے کو 550 ملین روپے کی ادائیگیاں نہیں کی گئیں۔ اور قومی ایئرلائن کے کیش فلو کی وجہ سے پی ایس او کو بروقت ادائیگیاں بھی نہیں ہو پا رہیں۔