سوشل میڈیا پلیٹ فارم ایکس پر انوارالحق کاکڑ نے لکھا کہ غزہ کے اسپتال پر اسرائیلی حملے کی شدید مذمت کرتے ہیں، جس میں متعدد شہریوں کی ہلاکتیں ہوئیں، اسپتال کو نشانہ بنانا غیر انسانی فعل ہے۔

انہوں نے لکھا کہ بین الاقوامی انسانی قانون اسپتالوں اور طبی عملے کو تحفظ فراہم کرتا ہے، عالمی برادری پر زور دیتے ہیں کہ وہ تشدد کو روکنے کے لیے تیزی سے کام کرے۔

نگراں وزیراعظم نے کہا کہ کچھ عرصہ قبل اقوام متحدہ کے سیکرٹری جنرل کے ساتھ اپنی بات چیت میں نے ان پر زور دیا تھا کہ عالمی برادری اسرائیل سے کہے کہ وہ بے گناہ فلسطینیوں کا قتل عام بند کرے۔

دوسری جانب پاکستان پیپلز پارٹی کے چیئرمین بلاول بھٹو زرداری اور مسلم لیگ (ن) کی سینئر نائب صدر مریم نواز نے غزہ میں اسپتال پر اسرائیلی بمباری کی مذمت کی ہے۔

اپنے بیان میں بلاول بھٹو زرداری نے کہا کہ اسرائیل نے اسپتال پر حملہ کر کے ظلم کی تمام حدیں پار کر دی ہیں، حملہ پوری انسانیت کے لیے باعث شرم ہے۔

مسلم لیگ (ن) کی سینئر نائب صدر مریم نواز نے غزہ میں اسپتال پر اسرائیلی بمباری کی مذمت کرتے ہوئے کہا کہ اب یہ بند ہونا چاہیے، ذمہ داروں کا احتساب ہونا چاہیے۔

واضح رہے کہ اسرائیل نے غزہ میں اسپتال پر بمباری کردی، جس کے نتیجے میں 800 سے زائد فلسطینی شہید ہوگئے.