بریگیڈیئر ریٹائرڈ حارث نواز نے کہا کہ غیرقانونی افراد فوری طور پر اپنے ملک واپس چلے جائیں، رجسٹرڈ افغان مہاجرین ہمارے مہمان رہیں گے۔

انہوں نے کہا کہ کسی بھی غیرقانونی مقیم غیرملکی کیلئے پاکستان میں کوئی جگہ نہیں ہے، جعلی شناختی کارڈ جاری کرنے والوں کیخلاف حکومت ایکشن لے رہی ہے۔

نگراں وزیر داخلہ نے کہا کہ غیرقانونی مقیم افرادکے انخلا کیلئے انتظامات کرلئے ہیں، جن ممالک کیساتھ زمینی راستے نہیں ہیں انہیں بائی ایئرروانہ کیا جائے گا۔

حارث نواز نے مزید کہا کہ کسی کے ساتھ زیادتی نہیں کریں گےملک کامفاد دیکھیں گے، سندھ میں کسی غیرقانونی مقیم شخص کو رہنے کی اجازت نہیں ہے ۔

دوسری جانب نگراں وزیرداخلہ سرفراد بگٹی نے کہا کہ تمام غیرقانونی افرادکی نشاندہی کرلی گئی ہے اور حتمی پلان مرتب کرلیا گیا ہے۔

ان کا کہنا تھا کہ غیر قانونی افراد کی معاونت کرنے والوں سے رعایت نہیں کی جائے گی، نادرا سے حاصل کردہ غیر قانونی شناختی کارڈ رکھنے والوں کیخلاف کارروائی ہوگی۔