سماجی رابطے کی ویب سائٹ ایکس پربھارت میں پولیس اور شہریوں کے درمیان پُرمزاح معاملہ سامنے آیا ہے۔ بھارتی خاتون کی جانب سے ممبئی پولیس سے ایک حیران کُن درخواست کی گئی۔

ایکس پر ایک خاتون نے ممبئی پولیس کو ٹیک کرتے ہوئے ان سے ’سکون‘ ڈھونڈنے کی درخواست کی ہے۔

خاتون نے پوسٹ میں لکھا کہ ’پولیس اسٹیشن جا رہی ہوں، سکون کھو گیا ہے میرا‘۔

اس درخواست کا پولیس نے دلچسپ جواب دیا، انہوں نے اس پوسٹ کو ری شئیر کرتے ہوئے کہا کہ ’ہم میں سے بہت سے لوگ سکون کی تلاش میں ہیں‘۔

انہوں نے مزید کہا کہ ’مس آریا، ہم میں سے بہت سے لوگ سکون کی تلاش میں ہیں۔ ہم اس بات پر آپ کے ممنون ہیں کہ آپ نے ہم پر اعتبار کیا اور ہمیں یقین ہے کہ آپ روح میں سکون کو محسوس کریں گی۔ کسی اور مسئلے کے لیے آپ بے شک ہمارے پاس آ سکتی ہیں‘۔

ممبئی پولیس نے دلچسپ انداز میں ہیش ٹیگ استعمال کرتے ہوئے لکھا کہ ’ممبئی کے لیے سکون یقینی بنا رہے ہیں‘۔

اسی اثنا میں ایک بھارتی شہری نے ممبئی پولیس کی ناقص کارکردگی کو تنقید کا نشانہ بناتے ہوئے کہا کہ ’پولیس نے آج تک کچھ ڈھونڈ کر دیا ہے؟‘

ممبئی پولیس کے اردو زبان کے استعمال پر ایک صارف نے ردِعمل دیتے ہوئے کہا کہ ’جاوید اختر اپنی آئی ڈی سے آؤ‘۔