سپریم کورٹ میں بجلی کی قیمتوں اور ٹیکسز کے معاملے پر جماعت اسلامی نے آئینی درخواست پر رجسٹرار آفس کے اعتراضات کے خلاف اپیل دائر کی۔

جماعت اسلامی کی جانب سے اپیل میں مؤقف اختیارکیا گیا کہ رجسٹرار آفس نے درخواست پر بے بنیاد اعتراضات عائد کیے، سپریم کورٹ کئی فیصلوں میں بجلی کی فراہمی کو بنیادی حق قراردے چکی ہے۔

اپیل میں کہا گیا کہ جماعت اسلامی کا اٹھایا گیا نکتہ ذاتی نہیں بلکہ اجتماعی نوعیت کا ہے، سپریم کورٹ ماضی میں بجلی کی قیمتوں کے حوالے سے متعدد درخواستیں قابل سماعت قرار دے چکی۔

جماعت اسلامی کی اپیل میں یہ مؤقف بھی اپنایا گیا کہ بنیادی حقوق کی فراہمی کے لیے دائر درخواست پر اعتراضات نہیں عائد کیے جا سکتے، استدعا ہے کہ رجسٹرار کے اعتراضات کالعدم قرار دیتے ہوئے آئینی درخواست سماعت کے لیے مقرر کرنے کا حکم دیا جائے۔