پاکستان بار کے اندرونی معاملات میں سندھ ہائیکورٹ کی مبینہ مداخلت کے معاملے پر پاکستان بار کونسل نے چیف جسٹس آف پاکستان سے سندھ ہائیکورٹ کے خلاف کارروائی کا مطالبہ کیا ہے۔

پاکستان بار کونسل نے اپنے اعلامیے میں کہا کہ چیف جسٹس پاکستان تحقیقات کے بعد سندھ ہائیکورٹ کے خلاف مناسب کارروائی کریں، مشاہدے میں آیا ہے کہ پاکستان بار کے فیصلوں کے خلاف سندھ ہائیکورٹ مقدمات سن رہی ہے، سندھ ہائیکورٹ سمیت کوئی صوبائی ہائیکورٹ پاکستان بارکونسل کے فیصلوں کا جائزہ نہیں لے سکتی۔

اعلامیے میں کہا گیا کہ پاکستان بار کونسل وکلاء کے امور سے متعلق ایک قانونی ادارہ ہے، پاکستان بار کونسل کے فیصلوں کا صرف اسلام آباد کی عدالتیں جائزہ لے سکتی ہیں۔

اعلامیے کے مطابق پاکستان بار کونسل اور اس کی ایگزیکٹیو کمیٹی کے فیصلوں کو قانونی تحفظ حاصل ہے، من پسند افراد کو نوازنے کے لیے سندھ ہائیکورٹ غیر قانونی طریقے سے مقدمات سن رہی ہے۔