پرتھ اسٹیڈیم میں پاکستانی شائقین کیلئے ’پاکستان بے‘ نامی 2 مخصوص پاکستان اسٹینڈز تعمیر کیے گئے ہیں۔

یہ پاکستانی اسٹینڈز ڈریسنگ روم کے باہر تعمیر کیے گئے ہیں اور انہیں الکوحل فری زون قرار دیا گیا ہے۔

یہاں آنے والے شائقین کو میچ دیکھنے کے دوران چائے، حلال فوڈ اور دیسی کھانے دیے جائیں گے۔

آسٹریلیا کی کرکٹ انتطامیہ نے میچ کے پہلے روز پاکستانی شائقین کے لیے خصوصی واک کا بھی اہتمام کیا ہے۔

واک میں شریک ہونے والے پہلے مشہور سلانی ایونیو سے پرتھ اسٹیڈیم پہنچیں گے۔ فاسٹ باولر حسن علی اور نوجوان کرکٹر صائم ایوب کی جانب سے پاکستانی فینز سے اس واک میں شرکت کی درخواست کی گئی ہے۔

ٹکٹ خریدنے کے خواہشمند افراد میچ کی تمام ٹکٹیں http://ticketmaster.com.au/ سے بُک کرواسکتے ہیں۔

میچ کے ٹکٹ کی قیمت 30 ڈالر ہے جبکہ ’پاکستان بے‘ کی ٹکٹیں رعایتی نرخوں پر دی جائیں گی۔

چار سال سے کم عمر بچوں کا اسٹیڈیم میں داخلہ مفت ہوگا جبکہ چار سے 15 سال تک کے بچوں کے لیے ٹکٹ کی قیمت 10 ڈالر مقرر کی گئی ہے۔

پاکستان اور آسٹریلیا کی ٹیسٹ ٹیمیں بینو قادر ٹرافی کے لیے 14 دسمبر سے پرتھ اسٹیڈیم میں آمنے سامنے ہوں گی۔