آج نیوز کے پروگرام ”فیصلہ آپ کا“ میں بات کرتے ہوئے افنان اللہ نے کہا کہ ہمیں الیکشن کمیشن کا ہر فیصلہ قبول ہے، حافظ آباد والا معاملہ پرانا ہے، ابھی اٹھایا جانا سمجھ سے باہر ہے۔

انھوں نے کہا کہ الیکشن کمشنر کی تبدیلی کا مطالبہ اچھی فرمائش نہیں، بار ایسوسی ایشنز کی جانب سے معاملہ اٹھانا بھی اہم ہے لیکن مجھے نہیں لگتا کہ معاملہ وکلاء تحریک تک جائے گا۔

ان کا کہنا تھا کہ ہم چاہتے ہیں کہ انتخابات 8 فروری سے آگے نہ جائیں، جن کےخلاف کیسز ہیں ان کو الیکشن لڑنے کی اجازت نہیں ہوگی، جن کا 9 مئی سے تعلق نہیں انھیں سیاسی سرگرمیوں کی اجازت ہونی چاہیے۔

سینیٹر افنان اللہ نے کہا کہ ہماری انتخابات کی پوری تیاری ہے، مریم نواز 2 حلقوں سے انتخابات لڑیں گی،6 جنوری سے انتخابی جلسے شروع کرنے کا پروگرام ہے۔

لیگی رہنما کا مزید کہنا تھا کہ پارٹی قائد میاں نوازشریف 2 حلقوں سے الیکشن لڑیں گے، جبکہ پارٹی صدر شہبازشریف بھی 2 حلقوں سے ہی انتخابات میں حصہ لیں گے۔