اداکار نے امریکی نشریاتی ادارے کو دیے گئے ایک انٹرویو میں اپنی نجی زندگی اور شوبز انڈسٹری سمیت کئی موضوعات پر گفتگو کی۔

علی سفینہ نے انٹرویو کے دوران یہ بھی واضح کیا کہ انہوں نے اپنے ڈرامے میں تیرے بن کے مرتصم (وہاج علی) کا مذاق نہیں اڑایا تھا۔

یمنیٰ زیدی کے ساتھ ڈرامہ ’تیرے بن‘ میں وہاج کا ایک سین سوشل میڈیا پر کافی وائرل ہوا تھا جس میں انہیں سفید شال کندھوں پر ڈالے دیکھا جاسکتا ہے۔

اس ڈرامے کے اس سین کے بعد علی سفینہ کے ایک ڈرامے کی قسط نشر ہوئی تھی جس میں انہوں نے پینٹ شرٹ کے اوپر ایک شال لے رکھی تھی۔

اس قسط کے بعد وہاج کے مداحوں کی جانب سے علی سفینہ کو شدید تنقید کا نشانہ بھی بنایا گیا۔

اداکار نے اس سے متعلق وضاحت کرتے ہوئے کہا کہ ’سین میں ساتھی اداکارہ سے گفتگو کرتے ہوئے جب میں جانے لگتا ہوں تو کارٹون کریکٹر بیٹمین کی نقل کرتے ہوئے اسے پھیلا لیتا ہوں تو لوگوں کو یوں محسوس ہوا کہ میں نے وہاج کی نقل اتاری ہے مگر ایسا بالکل بھی نہیں‘۔

علی سفینہ نے مزید کہا کہ ’دراصل یہ شال والا سین ڈرامے کا حصہ نہیں تھا۔ ہوا کچھ یوں تھا کہ کراچی میں اچانک سے خوب سردی ہو گئی اور کھلی فضا میں سین شوٹ ہونا تھا، تو جیسے ہی میں کمرے سے باہر کی جانب آیا تو ٹھنڈ محسوس ہونے پر اداکارہ کی شال اوڑھ لی اور تو اور پینٹ شرٹ پر شال اچھی نہیں لگ رہی تھی‘۔

اداکار نے اس حوالے سے مزید کہا کہ ’پھراچانک سے ذہن میں آیا کہ میرا یہ کردار مزاحیہ ہے تو میں اسے مشہور کارٹون کریکٹر بیٹ مین کے پروں کی طرح لے کر اوڑھنے لگا‘۔

واضح رہے کہ علی سفینہ کے مشہور پراجیکٹس میں ’سنو چندا 2‘، ’تعبیر‘، ’تاکے کی آئے گی بارات‘ اور ’جیسی آپکی مرضی‘ جیسے کامیاب ڈرامہ سیریل شامل ہیں۔